Codex Zographensis - Marco
Marco 2
Ꙇ вьниде пакꙑ къ н҄емоу] въ каперънаоумъ. по дьньхъ. Ꙇ слоухъ бꙑс ѣко въ домоу естъ
ꙇ абье събърашѧ сѧ мнози. ѣко къ томоу не въмѣштаахѫ сѧ. ни прѣдъ двьрьми ꙇ г҃лааше ꙇмъ слово.
Ꙇ придошѧ къ н҄емоу носѧште ослабл҄ена жилами. носимъ четꙑрьми.
ꙇ не могѫште пристѫпити къ н҄емоу. за народъ. отъкрꙑшѧ покровъ ꙇдеже бѣ.
ꙇ прокопавъше съвѣсишѧ одръ. на н҄емьже ослабл҄енъꙇ сь лежааше.
видѣвъ же и҃с вѣрѫ ꙇхъ. г҃ла ослабл҄еноуемоу.
чѧдо отъпоуштаѭтъ сѧ тебѣ грѣси твои.
бѣахѫ же етериі отъ кънижьникъ тоу. сѣдѧште. ꙇ помꙑшл҄ѣѭште въ сръдьцихъ своꙇхъ.
чьто сь. тако г҃летъ власвимиѭ.
къто можетъ отъпоуштати грѣхꙑ. тъкъмо единъ б҃ъ.
ꙇ разоумѣвъ и҃с д҃хомь своꙇмь. ѣко тако ти помꙑшл҄ѣѭтъ въ себѣ. рече ꙇмъ
чьто тако помꙑшл҄ѣете въ сръдьцихъ вашихъ.
чьто естъ оудобѣе решти. ослабл҄еноуемоу. отъпоуштаѭтъ ти сѧ грѣси. ли решти въстани. ꙇ възъми одръ твои. ꙇ ходи.
нъ да вѣсте ѣко власть ꙇмать с҃нъ ч҃скꙑ. ѡтьпоуштати на земи грѣхꙑ. г҃ла ослабленоумоу. тебѣ г҃л҄ѭ.
въстани възъми одръ твои. ꙇ иди въ домъ твоꙇ.
ꙇ въста абие. ꙇ възьмъ одръ ꙇзиде прѣдъ вьсѣми. ѣко дивл҄ѣахѫ сѧ вси. ꙇ славл҄ѣахѫ б҃а г҃л҄ѭште. ѣко
николиже тако видѣхомъ.
ꙇ изиде и҃с къ мор҄ю.
ꙇ вьсь народъ ꙇдѣаше къ н҄емоу. ꙇ оучааше ѩ.
Ꙇ мимогрѧдꙑ и҃с. видѣ леуꙉиѭ альфеова. сѣдѧшта на мꙑтьници.
ꙇ г҃ла емоу.
по мнѣ грѧди.
ꙇ въставъ въ слѣдъ его ꙇде.
Ꙇ бꙑстъ възлежѧштю емоу въ домоу его. ꙇ мнози мꙑтаре. ꙇ грѣшьници възлежаахѫ съ и҃смь. ꙇ съ оученикꙑ его.
бѣахѫ бо мнози.
ꙇ по н҄емь ꙇдошѧ.
ꙇ кънижьници ꙇ фарисѣи. видѣвъше і ѣдѫшть съ мꙑтари ꙇ грѣшьникꙑ. г҃лаахѫ оученикомъ его.
по чьто съ мꙑтари ꙇ грѣшьникꙑ ѣстъ ꙇ пьетъ.
Ꙇ слꙑшавъ и҃с г҃ла ꙇмъ.
не трѣбоуѭтъ съдравиі врачевъ. нъ болѧштеі.
не придъ бо призъватъ правьдьникъ. нъ грѣшьникъ въ покаание.
ꙇ бѣахѫ оученици ꙇоанови. ꙇ фарисеі постѧште сѧ.
ꙇ придошѧ ꙇ рѣшѧ емоу.
по чьто оученици ꙇоанови. ꙇ фарисѣꙇсци постѧтъ сѧ. а твоі оученици не постѧтъ сѧ.
ꙇ рече ꙇмъ и҃с.
еда могѫтъ с҃нове брачьниі постити сѧ. доньдеже съ н҄ими естъ женихъ.
елико врѣмѧ съ собоѭ ꙇмѫтъ жениха. не ꙇмѫтъ постити сѧ.
придѫтъ же дьние. егда отъꙇметъ сѧ отъ нихъ женихъ. ꙇ тъгда постѧтъ сѧ въ тꙑ дьни.
никътоже приставл҄ениѣ плата не бѣл҄ена. не приставл҄ѣетъ ризѣ ветъсѣ.
аште ли же ни. възъметъ коньць отъ н҄еѩ новое. отъ ветъхаего. ꙇ горьши дирѣ бѫдетъ.
ꙇ никътоже ни въливаетъ. вина нова въ мѣхꙑ вьтъхꙑ.
аште ли же ни. просадитъ вино ново. ꙇ вино пролѣетъ сѧ. ꙇ мѣси погꙑбнѫтъ.
нъ вино новое въ мѣхꙑ новꙑ вьльѣти.
Ꙇ бꙑстъ мимоходѧштоу емоу. въ сѫботꙑ сквѣзѣ сѣѣниѣ. ꙇ начѧшѧ оученици его пѫть творити. въстръгаѭште класꙑ.
ꙇ фарисѣі г҃лахѫ емоу.
виждь
чьто творѧтъ въ сѫботꙑ. егоже не достоꙇтъ.
ꙇ тъ г҃лааше ꙇмъ.
нѣсте ли николиже чьли. чьто створи д҃адъ. егда трѣбова. ꙇ възлака самъ ꙇ иже бѣахѫ съ н҄имь. како вьниде въ храмъ б҃жіи. при ѣви[авиа]фарѣ. арⸯхиереи. ꙇ хлѣбꙑ прѣдъложениѣ сънѣстъ. ꙇхъже не достоѣше ѣсти. тъкмо ꙇереомъ.
Ꙇ г҃лааше ꙇмъ и҃с.
сѫбота ч҃ка ради бꙑстъ. а не ч҃къ сѫботꙑ ради
Тѣмь же г҃ь естъ с҃нъ ч҃скꙑ сѫботѣ.
Marco 3
ꙇ въниде пакꙑ въ сънъмиште. Ꙇ бѣ тоу ч҃къ соухѫ рѫкѫ ꙇмꙑ.
ꙇ назираахѫ і. аште въ сѫботѫ ꙇцѣлитъ і. да на н҄ь в҃ъзглѭтъ.
ꙇ г҃ла ч҃коу ꙇмѫштоуемоу соухѫ рѫкѫ.
стани посрѣдѣ. ꙇ г҃ли ꙇмъ.
достоꙇ ли въ сѫботꙑ добро творити ли зъло творити. д҃шѫ с҃псти ли погоубити.
они же мльчаахѫ.
възърѣвъ на н҄ѧ съ гнѣвомь. скръбѧ о окамен҄ениі сръдьца ꙇхъ. г҃ла ч҃коу
простьри рѫкѫ твоѭ.
ꙇ простьрѣ.
ꙇ оутвръди сѧ рѫка его цѣла ѣкꙑ дроугаѣ.
Ꙇ абье ꙇшьдъше фарисѣи. съ іродиѣнꙑ. съвѣтъ сътварѣахѫ на н҄ь.
како ꙇ бѫ погоубили.
ꙇ҃с же отиде съ оученикꙑ своꙇми къ мор҄ю.
ꙇ многъ народъ отъ галилеѩ. по н҄емь ꙇдошѧ. ꙇ отъ ꙇюдеѩ. ꙇ отъ е҃лма. ꙇ отъ ꙇдоумѣѩ. ꙇ съ оного полоу ꙇордана.
ꙇ сѫштеі отъ тⸯоурѣ ꙇ сидона. много мъножьство. слꙑшавъше елико сътварѣаше придошѧ къ н҄емоу.
ꙇ рече оученикомъ своꙇмъ. да естъ при н҄емь ладиіца народа ради. да не сътѫжаѭтъ емоу.
мъногꙑ бо ꙇцѣли. ѣко нападаахѫ емь. хотѧште прикоснѫти сѧ емь. елико ꙇмѣахѫ ранꙑ.
Ꙇ егда видѣахѫ і д҃си нечистиі. припадаахѫ къ н҄емоу. ꙇ въпиѣхѫ г҃л҄ѭште. ѣко
тꙑ еси х҃ъ с҃нъ б҃жіи.
ꙇ много прѣштааше ꙇмъ. да авѣ творѧтъ его. ѣко вѣдѣахѫ х҃а самого сѫшта.
Ꙇ вьзиде на горѫ ꙇ призꙑва ѩже самъ въсхотѣ.
ꙇ идошѧ къ н҄емоу.
ꙇ сътвори. б҃ꙇ. да бѫдѫтъ съ н҄имь.
ꙇ посꙑлаетъ ѩ проповѣдати. ꙇ имѣти область. цѣлити недѫгꙑ. ꙇ изгонити бѣсꙑ.
ꙇ нарече ꙇмѧ симоноу петръ.
ꙇ ѣкова зеведеова. ꙇ ианⸯна братра ꙇѣковл҄ѣ. ꙇ нарече ꙇма ꙇменѣ. вооанирꙉиси. еже естъ с҃на громова.
ꙇ придошѧ въ домъ.
ꙇ събърашѧ сѧ пакꙑ народи. ѣко не мошти ꙇмъ ни хлѣба сънѣсти.
ꙇ слꙑшавъше ꙇже бѣахѫ оу н҄его. ꙇзидѫ ѩти і.
г҃лаахѫ бо ѣко неꙇстовъ естъ.
ꙇ кънижьници низъшьдъше отъ ꙇ҃елма г҃лаахѫ. ѣко вельзѣоулъ ꙇматъ. ꙇ ѣко о кънѧзи бѣсъ. ꙇзгонитъ бѣсꙑ.
ꙇ призъвавъ ѩ. въ притъчахъ г҃лааше ꙇмъ.
како можетъ сотона сотонѫ ꙇзгънати.
ꙇ аште ц҃рсо на сѧ раздѣлитъ сѧ. не можетъ стати ц҃рьство то.
ꙇ аште домъ на сѧ раздѣлитъ сѧ. не можетъ стати домъ тъ.
ꙇ аште сотона самъ въста на сѧ. ꙇ раздѣли сѧ. не можетъ стати. нъ коньчинѫ ꙇматъ.
никътоже не можетъ съсѫдъ крѣпъкаего. въшьдъ въ домъ его. расхꙑтити. аште не прьвѣе крѣпъкаего съвѧжетъ. ꙇ тъгда домъ его расхꙑтитъ.
а ꙇже аште власвимисаетъ на с҃тъꙇ д҃хъ. не ꙇматъ отъпоуштениѣ въ вѣкꙑ.
повиннъ
Marco 4
вьсе бꙑваетъ. да видѧште видѧтъ. ꙇ не оузьрѧтъ. ꙇ слꙑшѧште слꙑшѧтъ. ꙇ не разоумѣѭтъ. егда обратѧтъ сѧ. ꙇ отъпоустѧтъ сѧ ꙇмъ грѣси.
ꙇ г҃ла ꙇмъ.
не вѣсте ли притъчѧ сеѩ.
ꙇ како всѧ притъчѧ оумѣете.
сѣѩи слово сѣетъ.
се же сѫтъ ѣже на пѫти. ꙇдеже сѣетъ сѧ слово.
ꙇ егда оуслꙑшитъ. абие придетъ сотона. ꙇ отъꙇметъ слово. сѣаное въ сръдьцихъ ꙇхъ.
ꙇ си такожде сѫтъ. ꙇже на каменихъ сѣемиі. ꙇже егда слꙑшѧтъ слово. абье съ радостиѭ приемл҄ѫтъ е. ꙇ не ꙇмѫтъ корене вь себѣ. нъ врѣменни сѫтъ.
по томь же бꙑвъши печали. ли гон҄ению. словесе ради. абье съблажн҄ѣѭтъ сѧ
а си сѫтъ. сѣани въ тръниі. слꙑшѧштеи слово.
ꙇ печали вѣка сего. ꙇ льсть богатьствиѣ. ꙇ о прочиіхъ похотиі. въходѧштѧ подавл҄ѣѭтъ слово. ꙇ бес плода бꙑваетъ.
а си сѫтъ сѣаниі на добрѣі земли. ꙇже слꙑшѧтъ слово. ꙇ приемл҄ѫтъ е. ꙇ плодѧтъ сѧ. на
ꙇ г҃лааше ꙇмъ.
Егда приходитъ свѣтильникъ. да подъ спѫдомь положенъ бѫдетъ. ли подъ одромь. не да ли на свѣштьникъ възложѧтъ і.
нѣстъ бо ничьто же таꙇно. еже не авитъ сѧ.
ни бꙑстъ потаено. нъ да придетъ въ авл҄ение.
ꙇже ꙇматъ оуши слꙑшати да слꙑшитъ.
ꙇ г҃лааше ꙇмъ.
Бл҄юдѣте сѧ чьто слꙑшите.
въ н҄ѭже мѣрѫ мѣрите. намѣритъ сѧ вамъ. ꙇ приложитъ сѧ вамъ слꙑшѧштеꙇмъ.
Ꙇже бо аште ꙇматъ дастъ сѧ емоу.
а ꙇжь не ꙇматъ. ꙇ еже ꙇматъ отъꙇметъ сѧ отъ н҄его.
ꙇ г҃лааше.
тако естъ ц҃рсие б҃жие. ѣкоже ч҃къ въмѣтаетъ сѣмѧ въ земл҄ѫ. ꙇ съпитъ. ꙇ въстаетъ ношть ꙇ дьнь. ꙇ сѣмѧ прозѧбаетъ. ꙇ растетъ ѣкоже не вѣстъ онъ.
вь себѣ бо земл҄ѣ плодитъ сѧ. прѣжде трѣвѫ по томь же класъ. по томь же пьшеницѫ въ класѣ.
егда же съзьрѣетъ плодъ. посълетъ сръпъ. настоꙇтъ жѧтва.
ꙇ г҃лааше.
Чесомоу оуподобимъ ц҃рсие б҃жие.
ли коеі притъчи. приложимъ е
ꙇ тацѣми притъчами многами. г҃лааше ꙇмъ слово. ѣкоже можаахѫ слꙑшати.
бес притъчѧ же не г҃лааше ꙇмъ.
единъ же съказааше оученикомъ своꙇмъ вⸯсѣ.
ꙇ г҃ла ꙇмъ. въ тъ дьнь вечероу бꙑвъшю.
прѣꙇдѣмъ на онъ полъ.
отъпоуштьше народъ. поѩшѧ и ѣкоже бѣ въ ладиі. ꙇ инꙑ же ладиѩ бѣахѫ съ н҄ими.
ꙇ бꙑстъ боурѣ вѣтръна велиѣ.
влънꙑ же въливаахѫ сѧ въ ладиѭ. ѣко оуже погрѧзнѫти хотѣаше.
ꙇ бѣ самъ на кръмѣ. на дохъторѣ съпѧ.
ꙇ възбоудишѧ и.
ꙇ г҃лаахѫ емоу.
оучител҄ю. не родиши ли ѣко погꙑбаемъ.
Ꙇ въставъ запрѣти вѣтроу. ꙇ рече морю.
мльчи. ꙇ оустани.
ꙇ оулеже вѣтръ. ꙇ бꙑстъ тишина вельѣ.
ꙇ рече ꙇмъ
чьто тако страшиви есте.
како не ꙇмате вѣрꙑ.
ꙇ възбоѣшѧ сѧ страхомь вельемь. ꙇ г҃лаахѫ дроугъ къ дроугоу.
къто оубо сь естъ. ѣко і вѣтри ꙇ мор҄е послоушаѭтъ его.
Marco 5
ꙇ придѫ на онъ полъ мор҄ѣ. въ странѫ гадаринскѫ:
Ꙇ излѣзъшю же емоу ꙇс корабл҄ѣ. абье. сърѣте и отъ гробъ ч҃къ. д҃хмь нечистомь. ꙇже жилиште ꙇмѣаше въ гробѣхъ. ꙇ ни желѣзномь ѫжемь. его никтоже не можааше его съвѧзати. зан҄е емоу много кратꙑ. пѫтꙑ ꙇ ѫжи желѣзнꙑ. съвѧзаноу сѫштю прѣтрьзаахѫ сѧ отъ н҄его ѫжа желѣзнаа. ꙇ пѫта съкроушаахѫ сѧ. ꙇ никтоже его не можааше оумѫчити. ꙇ вꙑнѫ дьнь ꙇ ношть въ гробѣхъ. ꙇ въ горахъ бѣ. въпиѩ ꙇ тлъкꙑ сѧ камениемь.
оузьрѣвъ же ꙇ҃са ꙇздалече. тече ꙇ поклони сѧ емоу. ꙇ възъпивъ гласомь вельемь г҃ла.
чьто мьнѣ ꙇ тебѣ і҃се. с҃не б҃а вꙑшьн҄ѣего.
заклинаѭ тѧ б҃мь.
не мѫчи мене.
г҃лааше бо емоу
ꙇзиди д҃ше нечистъꙇ отъ ч҃ка.
ꙇ въпрашааше и.
како ти естъ ꙇмѧ.
ꙇ г҃ла емоу.
леꙉеонъ мьнѣ ꙇмѧ естъ. ѣко мнози есмъ.
ꙇ мол҄ѣаше і много. да не посъл҄етъ ꙇхъ кромѣ странꙑ.
бѣ же тоу стадо свино пасомо велье. при горѣ.
ꙇ молишѧ і вси бѣси г҃л҄ѭште.
посъл҄и нꙑ вь свиньѩ. да вь н҄ѧ вьнидемъ.
ꙇ абье повелѣ ꙇмъ и҃с.
ꙇ ишьдъше доуси нечистиі. вънидошѧ въ свиниѩ. ꙇ оустръми сѧ стадо по брѣгоу въ мор҄е.
бѣ же ꙇхъ ѣко дьвѣ тꙑсѧшти. ꙇ оутапаахѫ въ мор҄и.
ꙇ пасѫштеи свиниѩ бѣжашѧ. ꙇ възвѣстишѧ въ градѣ. ꙇ на селѣхъ.
ꙇ придѫ видѣтъ бꙑвъшааго.
ꙇ придѫшѧ къ і҃сви. ꙇ видѣшѧ бѣсъновавъшааго сѧ. сѣдѧшта обльчена. ꙇ съмꙑслѧшта. ꙇмѣвъшааго леꙉеонъ. ꙇ оубоѣшѧ сѧ. ꙇ повѣдѣшѧ ꙇмъ видѣвъшеи. како бꙑс бѣсъноумоу. ꙇ о свиниѣхъ.
ꙇ начѧшѧ молити і. отити отъ прѣдѣлъ ꙇхъ.
Ꙇ въходѧштоу емоу въ ладиіцѫ. мол҄ѣаше і бѣсъновавъꙇ сѧ. да би съ н҄имь бꙑлъ.
ꙇ҃с же не дастъ емоу. нъ г҃ла емоу.
ꙇди въ домъ твои къ твоꙇмъ.
ꙇ възвѣсти ꙇмъ. елико ти г҃ь сътвори. ꙇ помилова тѧ.
ꙇ иде. ꙇ начѧтъ проповѣдовати. въ декаполи. елико сътвори емоу и҃с. ꙇ вси дивл҄ѣахѫ сѧ.
Ꙇ прѣѣвъшоумоу въ кораби пакꙑ на онъ полъ. събъра сѧ народъ многъ о н҄емь ꙇ бѣ при мори.
Ꙇ се приде единъ отъ арⸯхисунагога. ꙇменемь ꙇаіръ. ꙇ видѣвъ ꙇ паде на ногоу его. ꙇ мол҄ѣаше и много г҃лѧ. ѣко
дъшти моѣ на коньчинѣ естъ.
да пришьдъ възложиши на н҄ѭ рѫцѣ. да с҃пена бѫдетъ ꙇ оживетъ.
ꙇ иде съ н҄имь.
ꙇ по н҄емь ꙇдѣаше народъ многъ. ꙇ оугнѣтаахѫ и.
Ꙇ се жена етера сѫшти. въ точениі кръве. лѣт б҃ꙇ. ꙇ много пострадавъши. отъ многъ врачевъ. ꙇ иждивъши вьсе свое. ꙇ ни единоѩ пользѧ обрѣтъши. нъ паче въ горе пришьдъши. слꙑшавъши о ꙇ҃сѣ. пришьдъши въ народѣ. съ зади. прикоснѫ сѧ ризѣ его.
г҃лааше бо. ѣко
аште прикоснѫ сѧ понѣ ризѣ его. с҃пена бѫдѫ.
ꙇ абье ꙇсѧкнѫ ꙇсточьникъ кръве еѩ. ꙇ разоумѣ тѣломь ѣко ꙇцѣлѣетъ отъ ранꙑ.
ꙇ абье и҃с оштюшть вь себѣ. силѫ ꙇшьдъшѫ. отъ н҄его. обрашть сѧ въ народѣ г҃лааше.
къто прикоснѫ сѧ ризъ моꙇхъ.
ꙇ г҃лашѧ емоу оученици его.
видѧ народъ оугнѣтаѭшть тѧ ꙇ г҃леши.
къто сѧ прикоснѫ мнⸯѣ.
ꙇ озирааше сѧ видѣти. сътворьшѫѭ се.
жена же оубоѣвъши сѧ. ꙇ трепештѫшти. вѣдѫшти еже бꙑстъ еі. приде ꙇ припаде къ н҄емоу. ꙇ рече емоу вьсѫ ꙇстинѫ.
ꙇ҃с же рече еі.
дъшти вѣра твоѣ с҃пе тѧ.
ꙇди съ миромь.
ꙇ бѫди цѣла отъ ранꙑ твоеѩ.
Еште г҃л҄ѭштю емоу. придошѧ отъ арⸯхисунагога г҃лѭште. ѣко
дъшти твоѣ оумрѣтъ.
чьто движеши оучител҄ѣ.
ꙇ҃с же слꙑшавъ слово г҃лемое. г҃ла архисунагогови.
не боꙇ сѧ
тъкмо вѣроуі.
ꙇ не остави ꙇти по себѣ. ни единого же. тъкъмоу петра. ꙇ ѣкова. ꙇ оанна братра ꙇѣковл҄ѣ.
ꙇ приде въ домъ арⸯхисунагоговъ. ꙇ видѣ мльвѫ. ꙇ плачѫштѧ сѧ. ꙇ кличѫштѧ много. ꙇ въшедъ г҃ла ꙇмъ.
чьто мльвите. ꙇ плачете сѧ.
отроковица нѣстъ оумръла нъ съпитъ.
ꙇ рѫгаахѫ сѧ емоу.
онъ же ꙇзгьнавъ вьсѧ. поѩтъ о҃ца отроковици ꙇ м҃рь. ꙇ иже бѣшѧ съ н҄имь. ꙇ вьниде ꙇдеже бѣ отрочѧ лежѧ.
ꙇ имъ за рѫкѫ отроковицѫ. г҃ла еі.
тⸯалитакоумъ. еже естъ съказаемо.
дѣвице тебѣ г҃л҄ѭ
въстани.
ꙇ абье въста дѣвица ꙇ хождааше.
бѣ бо лѣтома ꙇ҃б.
ꙇ оужаснѫшѧ сѧ оужасомь вельемь.
ꙇ запрѣти ꙇмъ много. да никътоже не оувѣстъ сего. ꙇ рече
дадите еи ѣсти.
Marco 6
Ꙇ ишьдъ отътѫдѣ. ꙇ приде въ о҃чство свое. ꙇ по н҄емь ꙇдошѧ оученици его.
ꙇ бꙑвъши сѫботѣ. начѧтъ на сънъмишти оучити. ꙇ мнози слꙑшавъше дивл҄ѣахѫ сѧ о оучениі его г҃лѭште.
отъкѫдѣ се естъ семоу. ꙇ чьто прѣмѫдрость данаа емоу.
ꙇ силꙑ такꙑ рѫкама его бꙑваѭтъ.
не сь ли естъ текⸯтонъ. с҃нъ мариінъ. ꙇ братръ же ꙇѣковоу. ꙇ осиі. ꙇ июдѣ. ꙇ симоноу.
не ꙇ ли сестрꙑ его сѫтъ сьде въ насъ.
ꙇ съблажн҄ѣхѫ сѧ о н҄емь.
глааше же ꙇмъ и҃с. ѣко нѣстъ пророкъ бештьсти. тъкъмо въ своемь отьчьствиі. ꙇ въ рождениі. ꙇ въ домоу своемоу.
ꙇ не можааше тоу ни единоѩ же силꙑ сътворити.
тъкъмо на мало недѫжьникъ възложи рѫцѣ ꙇ ицѣли.
ꙇ диви сѧ за невѣрьствие ꙇхъ.
ꙇ обьхождааше градьцѧ оучѧ.
Ꙇ г҃лааше ꙇмъ.
ꙇжде же колижьдо вьнидете въ домъ. тоу прѣбꙑваꙇте. доꙇдеже ꙇзидете отътѫдѣ.
ꙇ елико аште не приемл҄ѭтъ васъ. ни послоушаѭтъ васъ. ꙇсходѧште отътѫдоу. отътрѧсѣте прахъ. ꙇже естъ подъ ногами вашими. въ съвѣдѣтельство ꙇмъ.
амин г҃л҄ѭ вамъ
отърадьнѣе бѫдетъ. содомомъ. ли гомор҄ѣнемъ. въ дьнь сѫдънъꙇ. неже градоу томоу.
ꙇ ишьдъше проповѣдаахѫ. да покаѭтъ сѧ. ꙇ бѣсꙑ многꙑ ꙇзган҄ѣахѫ. ꙇ мазаахѫ олѣомь. многꙑ недѫжьнꙑѩ. ꙇ ицѣл҄ѣахѫ.
ꙇ оуслꙑша ц҃рь ꙇродъ. слоухъ ꙇ҃свъ. авѣ бо бꙑстъ ꙇмѧ его. ꙇ г҃лааше. ѣко ꙇоанъ крьстѧі въста отъ мрътвъꙇхъ. ꙇ сего ради силꙑ дѣѭтъ сѧ о н҄емь
ꙇни же г҃лаахѫ ѣко ꙇлиѣ естъ.
ꙇни же г҃лаахѫ ѣко пророкъ естъ. ѣко единъ отъ пророкъ:
слꙑшавъ же ꙇродъ рече. ѣко
егоже азъ. оусѣкнѫхъ ꙇоанна. сь естъ.
тъ въста отъ мрътвъꙇхъ.
Тъ бо ꙇродъ. посълавъ ѩтъ ꙇоана. ꙇ съвѧза і. въ тьмьници. ꙇродиѣдꙑ ради. женꙑ филипа братра своего. ѣко ожени сѧ. еѭ.
глааше бо ꙇоанъ ꙇродови. ѣко
не достоꙇтъ тебѣ. ꙇмѣти женꙑ филипа брата своего.
ꙇродиѣ же гнѣвааше сѧ на н҄ь. ꙇ хотѣаше і оубити. ꙇ не можааше.
ꙇродъ бо боѣше сѧ ꙇоана. вѣдꙑ мѫжа правьдъна ꙇ с҃та. ꙇ хран҄ѣаше і. ꙇ послоушаѩ его мъного творѣаше. ꙇ въ сласть его слоушааше.
ꙇ приключьшю сѧ дьни потрѣбъноу. егда ꙇродъ рождьствоу своемоу вечерѫ твор҄ѣаше. кънѧземъ своꙇмъ ꙇ тꙑсѫштьникомъ. ꙇ старѣꙇшинамъ. галилѣꙇскамъ. ꙇ въшьдъши дъштери еѩ. ꙇродиѣдѣ. ꙇ плѧсавъши. ꙇ оугождьши ꙇродови. ꙇ възлежѧштіимъ съ н҄имь. рече ц҃рь дѣвици.
емоуже аште хоштеши дамь ти.
ꙇ клѧтъ сѧ еі. ѣко
егоже аште просиши дамь ти. до полъ ц҃рсиѣ моего.
она же ꙇшьдъши рече къ м҃ри своеі.
чесо прошѫ.
она же рече
главꙑ ꙇоана крьстител҄ѣ.
ꙇ въшьдъши абье съ тъштаниемь къ ц҃рю. проси г҃лѭшти.
хоштѫ да ми даси оусѣченѫ на бл҄юдѣ главѫ. ꙇоана крьстител҄ѣ.
ꙇ прискръбьнъ бꙑстъ ц҃рь
за клѧтвꙑ. ꙇ възлежѧштихъ съ н҄имь. не въсхотѣ отърешти сѧ еі.
ꙇ абье посълавъ ц҃рь воꙇна. повелѣ принести главѫ его.
онъ же шьдъ оусѣкнѫ і въ тьмьници. ꙇ принесе главѫ его на бл҄юдѣ. ꙇ дастъ дѣвици. ꙇ дѣвица дастъ ѭ м҃ри своеі.
ꙇ слꙑшавъше оученици его. придошѧ ꙇ вьзѧшѧ троупъ его. ꙇ положишѧ і въ гробѣ.
ꙇ събърашѧ сѧ а҃поли къ і҃су. ꙇ възвѣстишѧ емоу всѣ. елико сътворишѧ. ꙇ елико наоучишѧ.
ꙇ рече ꙇмъ.
придѣте вꙑ сами въ мѣсто едини. ꙇ почиіте мало.
бѣахѫ бо приходѧштеі. ꙇ оходѧштеи мнози.
ꙇ не бѣ ꙇмъ коли понѣ ѣсти.
ꙇ идошѧ въ поусто мѣсто корабл҄емь едини.
ꙇ видѣшѧ ѩ ѣдѫштѧ. ꙇ познашѧ ѩ мнози. ꙇ пѣши отъ всѣхъ градъ тѣшѧ тамо. ꙇ варишѧ ѩ.
ꙇ ишьдъ и҃с видѣ народъ многъ. ꙇ мили емоу бꙑшѧ. зан҄е бѣахѫ ѣко овьцѧ не ꙇмѫштѧ пастоуха. Ꙇ начѧтъ оучити ѩ много.
ꙇ минѫвъшю часоу. пристѫпьше къ н҄емоу оученици его. г҃лашѧ ѣко поусто естъ мѣсто. ꙇ оуже година минѫ.
отъпоусти ѩ. да шьдъше. въ окръстън҄иіхъ селѣхъ ꙇ вьсехъ. коупѧтъ себѣ хлѣбꙑ.
не ꙇмѫтъ бо чьсо ѣсти.
онъ же отъвѣштавъ рече ꙇмъ.
дадите ꙇмъ вꙑ ѣсти.
ꙇ г҃лашѧ емоу. да
шьдъше коупимъ. дьвѣма сътома пѣнѧзь хлѣбꙑ. ꙇ дамъ ꙇмъ ѣсти.
Ѡнъ же г҃ла ꙇмъ.
колико ꙇмате хлѣбъ.
ꙇдѣте [да]дите.
ꙇ оувѣдѣвъше г҃лашѧ.
д҃ хлѣбъ. ꙇ б҃ рꙑбѣ.
ꙇ повелѣ ꙇмъ посадити ѩ всѧ. на сподꙑ. на сподꙑ. на трѣвѣ зеленѣ.
ꙇ възлегошѧ на лѣхꙑ. на лѣхꙑ. по сътоу ꙇ пѧти десѧтъ.
ꙇ приімъ д҃ хлѣбъ. ꙇ б҃ рꙑбѣ. ꙇ възьрѣвъ на н҃бо б҃гви. ꙇ прѣломи хлѣбꙑ. ꙇ даѣше оученикомъ своꙇмъ. да полагаѭтъ прѣдъ н҄ими. ꙇ обѣ рибѣ раздѣли всѣмъ.
ꙇ ѣшѧ вси ꙇ насꙑтишѧ сѧ.
ꙇ вьзѧшѧ оукроухъ. б҃ꙇ коша ꙇсплънь. ꙇ отъ рꙑбоу.
ѣдъшиіхъ же бѣ хлѣбꙑ. пѧть тꙑсѫшть мѫжь.
Ꙇ абье оубѣди оученикꙑ своѩ. вьнити въ корабл҄ь. ꙇ варити і на ономь полоу. къ видъсаꙇдѣ. доньдеже самъ отъпоуститъ народꙑ.
ꙇ отърекъ сѧ ꙇмъ. ꙇде въ горѫ помолитъ сѧ.
Ꙇ вечеръ бꙑвъшю. бѣ бо корабл҄ь посрѣдѣ мор҄ѣ. а сь единъ на земл҄и.
ꙇ видѣвъ ѩ страждѫштѩ въ гребениі. бѣ бо вѣтръ противьнъ ꙇмъ. ꙇ при четврътѣі стражи ноштьнѣи. ꙇ приде къ н҄имъ по мор҄ю ходѧ.
ꙇ хотѣ минѫти ѩ.
они же видѣвъше і по мор҄ю ходѧшть. непьштевашѧ призракъ бꙑти. ꙇ възъвашѧ.
вси бо видѣвъше і. ꙇ вьзмѧтошѧ сѧ.
онъ же абье г҃ла съ н҄ими. ꙇ рече ꙇмъ.
Дръзаꙇте
азъ есмь
не боꙇте сѧ.
ꙇ въниде къ н҄имъ въ корабл҄ь. ꙇ оулеже вѣтръ.
ꙇ ѕѣло ꙇзлиха дивл҄ѣахѫ сѧ. ꙇ оужасаахѫ сѧ.
не разоумѣшѧ бо о хлѣбѣхъ. нъ бѣ сръдьце ꙇхъ окамен҄ено.
ꙇ приѣхавъше придошѧ въ земл҄ѭ ꙉенисаретьскѫ. ꙇ присташѧ.
ꙇшⸯдъшемъ же ꙇмъ ꙇс корабл҄ѣ. абье познашѧ и. ꙇ прѣтѣшѧ вьсѫ странѫ тѫ. ꙇ начѧсѧ приносити. на одрѣхъ болѧштѧѩ. ꙇдеже слꙑшаахѫ и ѣко тоу естъ.
ꙇ ѣможе колижьдо. въхождааше въ вьси. ли въ градꙑ. ли вь села. на распѫтиіхъ. полагаахѫ недѫжьнꙑѩ. ꙇ мол҄ѣахѫ и. да понѣ вьскрили ризꙑ его прикоснѫтъ сѧ.
ꙇ елико аште прикасаахѫ сѧ емь. с҃пени бꙑваахѫ.
Marco 10
ꙇ бѫдете оба въ плъть единѫ.
Marco 14
ꙇ посъла дъва отъ оученикъ своꙇхъ.
ꙇ г҃ла ꙇма.
ꙇдѣта въ градъ. ꙇ сърѧштетъ вꙑ ч҃къ. въ скѫдольницѣ водѫ несꙙ.
по н҄емь ꙇдѣта.
ꙇ идеже аште вьнидетъ. рьцѣта г҃ноу домоу.
оучител҄ь г҃летъ.
къде естъ обитѣл҄ь. ꙇдеже пасхѫ съ оученикꙑ моꙇми сънѣмь.
ꙇ тъ вама покажетъ горьницѫ вꙑсокѫ. постъланѫ готовѫ.
тоу оуготоваꙇта намъ.
ꙇ изидосте оученика. ꙇ придосте въ градъ. ꙇ обрѣтосте ѣкоже рече ꙇма. ꙇ оуготовасте пасхѫ.
Ꙇ вечероу бꙑвъшю. приде съ обѣма на десѧте.
ꙇ вьзлежѧштемъ ꙇмъ ꙇ ѣдѫштемъ. рече и҃с.
аминⸯ. г҃лѭ вамъ. ѣко единъ отъ васъ прѣдастъ мѧ. ѣдꙑ съ мноѭ.
Ѡни же начѧшѧ скръбѣти ꙇ г҃лати емоу. единъ по единомоу.
еда азъ.
ꙇ дроугꙑ
еда азъ.
Ѡнъ же отъвѣштавъ рече ꙇмъ.
единъ отъ обою на десѧте. омочьі съ мъноѭ въ солило
с҃нъ же ч҃скъꙇ ꙇдетъ ѣкоже естъ пⸯсано о н҄емь.
Горе же ч҃коу томоу. ꙇмьже с҃нъ ч҃скꙑ прѣдаетъ сѧ.
добрѣе емоу би бꙑло. аште не би родилъ сѧ ч҃къ тъ.
Ꙇ ѣдѫштемъ ꙇмъ. приімъ и҃с хлѣбъ. ꙇ хвалѫ въздавъ. б҃лгсвешть прѣломи. ꙇ дастъ ꙇмъ.
ꙇ рече
приімѣте
се естъ тѣло мое.
Ꙇ приімъ чашѫ хвалѫ въздавъ. дастъ ꙇмъ. ꙇ пишѧ отъ н҄еѩ вси.
ꙇ рече ꙇмъ
се естъ кръвь моѣ. новаго завѣта. проливаемаѣ за многꙑ.
Аминⸯ. г҃л҄ѭ вамъ. ѣко оуже не ꙇмамь пити отъ плода лозънааго. до того дьне. егда пьѭ ꙇ новь ц҃рсьи б҃жіи.
Ꙇ въспѣвъше ꙇзидѫ. въ горѫ елеоньскѫѭ.
Ꙇ г҃ла ꙇмъ и҃с. ѣко вьси съблазните сѧ о мнѣ. въ сьѭ ношть.
Пⸯсано бо естъ.
поражѫ пастꙑр҄ѣ. ꙇ овьцѧ разбѣгнѫтъ сѧ.
нъ по томь егда въскръснѫ. вар҄ѭ вꙑ въ галилеі.
Петръ же рече емоу.
ꙇ аште ꙇ вьси съблазнѧтъ сѧ нъ не азъ.
ꙇ г҃ла емоу и҃с.
аминⸯ. г҃л҄ѭ ти. ѣко тꙑ дьньсь въ сиѭ ношть. прѣжде даже въторицеѭ. коуръ не възгласитъ. три кратꙑ отъвръжеши сѧ мене.
Петръ же ꙇзлиха г҃лааше паче.
аште ми сѧ лоучитъ оумрѣти съ тобоѭ. не отъвръгѫ сѧ тебе.
такожде ꙇ вси г҃лаахѫ.
Ꙇ придошѧ вь вьсь ꙉенⸯсимани.
Ꙇ г҃ла оученикомъ своꙇмъ.
сѧдѣте сьде. доньдеже шьдъ помол҄ѭ сѧ.
ꙇ поѩтъ. петра. ꙇ ѣкова. ꙇ иоанⸯна. съ собоѭ. ꙇ начѧтъ оужасати сѧ ꙇ тѫжити.
Ꙇ г҃ла ꙇмъ.
прискръбъна естъ д҃ша моѣ до съмръти.
пожидѣте сьде ꙇ бьдите.
Ꙇ прѣшьдъ мало паде на земл҄и. ꙇ мол҄ѣаше сѧ. да аште възможьно естъ. мимоꙇти отъ н҄его чѣсъ.
Ꙇ г҃ла
авⸯва о҃ць. вьсѣ възможьна тебѣ сѫтъ. мимонести чашѫ сьѭ отъ мене.
нъ не ѣко азъ хоштѫ. нъ еже тꙑ.
Ꙇ приде ꙇ обрѣте ѩ съпѧштѧ. ꙇ г҃ла петрови.
симоне съпиши ли. не възможе единого часа побьдѣти.
Бьдите ꙇ молите сѧ. да не вьнидете въ напасть.
д҃хъ бо бьдръ а плъть немоштьна.
Ꙇ пакꙑ шьдъ. помоли сѧ тожде слово рекъ.
ꙇ възврашть сѧ. обрѣте ѩ пакꙑ съпѧштѧ.
бѣашете бо ꙇмъ очи тѧготьнѣ.
ꙇ не оумѣахѫ чьто бишѧ отъвѣштали емоу.
Ꙇ приде третиіцеѭ. ꙇ г҃ла ꙇмъ.
съпите прочее почиваꙇте. приспѣ коньчина. приде часъ. се прѣдаетъ сѧ с҃нъ ч҃скъꙇ. въ рѫцѣ грѣшьникомъ.
въстанѣте ꙇдѣмъ.
се прѣдаѩі мѧ приближи сѧ.
Дастъ же прѣдаѩі его знаменье ꙇмъ г҃лѧ.
егоже аште лобъжѫ ꙇмѣте и то естъ. ꙇ ведѣте і съхраньно.
ꙇ пришьдъ абье пристѫпь къ н҄емоу г҃ла.
рабби рабби.
ꙇ облобꙑза і.
Ѡни же възложишѧ рѫцѣ на н҄ь ꙇ ѩшѧ і.
единъ же отъ стоѩштиіхъ. ꙇзвлькъ ножь. оудари раба архⸯиереова. ꙇ оурѣза емоу оухо.
ꙇ отъвѣштавъ и҃с рече ꙇмъ.
ѣко на разбоꙇника ли ꙇзидосте. съ орѫжьіми ꙇ дрькол҄ьми. ѩти мене.
по всѧ дьни бѣхъ въ васъ. оучѧ въ цръкъве ꙇ не ѩсте мене.
Нъ да събѫдѫтъ сѧ кънигꙑ.
ꙇ оставьше і бѣжашѧ.
ꙇ единъ етеръ юноша по н҄емь ꙇде. одѣнъ въ пон҄ѣвицѫ нагъ. ꙇ ѩшѧ ꙇ юношѫ.
онъ же оставь пон҄ѣвицѫ. нагъ бѣжа оть н҄ихъ.
ꙇ ведошѧ и҃са къ архⸯиереоу каꙇфѣ.
ꙇ сънидѫ сѧ къ н҄емоу вси архⸯиереі. ꙇ старьци. ꙇ кън҄ижьници.
Ꙇ петръ ꙇдѣаше ꙇздалече вь слѣдъ его. до вънѫтрь въ дворъ архиереовъ. ꙇ бѣ сѣдѧ съ слоугами. ꙇ грѣѩ сѧ при свѣшти.
Архⸯиереꙇ же ꙇ вьсь съ ньмъ. ꙇскаахѫ на ꙇ҃са. съвѣдѣтел҄ьства да і оубьѭтъ. ꙇ не обрѣтаахѫ.
мнози бо лъжи съвѣдѣтел҄ьствоваахѫ на н҄ь.
ꙇ не бѣахѫ равъна съвѣдѣтел҄ьствьѣ.
Ꙇ етериі въставъше. лъжѫ съвѣдѣтельствоваахѫ на н҄ь г҃л҄ѭште.
ѣко мꙑ слꙑшахомъ ꙇ г҃лѭшть. ѣко
азъ разор҄ѭ цръковь сиѭ рѫкотворенѫѭ. ꙇ трьми дьнꙑ. ꙇно нерѫкотворенѫ съзиждѫ.
тако же не бѣ равъно съвѣдѣтел҄ьство ꙇхъ.
ꙇ ставъ арⸯхиереи посрѣдѣ. въпроси ꙇ҃са г҃лѧ.
не отъвѣштаваеши ли ничьсоже. чьто сиі на тѧ съвѣдѣтел҄ьствоуѭтъ.
ꙇс же мльчааше. ꙇ ничьсоже не отъвѣштавааше.
Пакꙑ архиереі въпроси і. г҃лѧ емоу.
тꙑ ли еси х҃ъ с҃нъ б҃лгвенааго.
ꙇ҃с же рече
азъ есмь.
Ꙇ оузьрите с҃на ч҃скаго. о деснѫѭ сѣдѧшта силꙑ. ꙇ грѧдѫшта. съ облакꙑ н҃ебскъꙇми.
Архⸯиереі же растръзавъ ризꙑ своѩ г҃ла.
чьто еште трѣбоуемъ съвѣдѣтел҄ьства.
чьто вамъ сѧ авл҄ѣетъ.
Ѡни же вси осѫдишѧ і. повиньноу бꙑти съмръти.
ꙇ начѧшѧ етериі пл҄ьвати на н҄ь. ꙇ прикрꙑвати лице его. ꙇ мѫчити і. ꙇ г҃лати емоу.
прорьци намъ х҃е къто естъ оударивꙑ тѧ.
ꙇ слоугꙑ бьѭште і за ланитѫ. приѩшѧ і.
Ꙇ сѫштю петрови низоу на дворѣ. приде едина отъ рабꙑн҄ь арⸯхⸯиереовъ. ꙇ видѣвъши петра грѣѭшта сѧ. възьрѣвъши на н҄ь ҄гла.
Ꙇ тꙑ съ назарѣаниномь ꙇ҃смь бѣ.
Онъ же отъвръже сѧ г҃лѧ
не оумѣѭ ни съвѣмь. чьто тꙑ г҃леши. ꙇ изиде вънъ на прѣдъдворие.
ꙇ коуръ въспѣтъ.
ꙇ видѣвъши і пакꙑ ꙇна рабꙑн҄и. начѧтъ г҃лати къ стоѩштиімъ. ѣко сь отъ н҄ихъ естъ.
онъ же пакꙑ отъмѣтааше сѧ.
ꙇ не по многоу пакꙑ стоѩштеі. г҃лаахѫ петрови.
въ ꙇстинѫ отъ н҄ихъ еси. ꙇбо галилеанинъ еси. ꙇ бесѣда твоѣ подобитъ ти сѧ.
Ѡнъ же начѧтъ ротити сѧ ꙇ клѧти сѧ. ѣко
не вѣмь ч҃ка сего. еже г҃лете.
ꙇ вътори] ꙇ въторицеѭ коуръ въспѣтъ.
ꙇ помѣнѫ петръ г҃лъ. ѣкоже рече емоу и҃с.
прѣжде даже коуръ не възгласитъ. дъва кратꙑ отъвръжеши сѧ мене. три кратꙑ.
ꙇ начьнъ плакааше сѧ.
Marco 15
Ꙇ абье на оутрьѣ. съвѣтъ створишѧ архⸯиереі. съ старⸯци ꙇ кънижьникꙑ. ꙇ вьсь сънъмъ. съвѧзавъше ꙇ҃са ведошѧ. ꙇ прѣдашѧ і пилатови.
Ꙇ въпроси і пилатъ.
тꙑ ли еси ц҃рь ꙇюдеꙇскъ.
онъ же отъвѣштавъ рече емоу.
тꙑ г҃леши.
ꙇ г҃лаахѫ на н҄ь архиерѣі много.
онъ же ничьсоже не отъвѣштавааше.
Пилатъ же пакꙑ въпрашааше і г҃лѧ.
не отъвѣштаваеши ли ничьсоже.
виждь колико на тѧ съвѣдѣтел҄ьствоуѭтъ.
ꙇ҃с же къ н҄емоу ничьсоже не отъвѣшта. ѣко дивити сѧ пилатови.
Бѣ же нарицаемъꙇ вараава. съ своіми ковьникꙑ съвѧзанъ. ꙇже въ горѣ оубьіства створишѧ.
ꙇ възъпивъ народъ. начѧ просити. ѣкоже творѣаше ꙇмъ.
Пилатъ же отъвѣшта ꙇмъ г҃лѧ.
хоштете ли да отъпоуштѫ вамъ ц҃рѣ ꙇюдеꙇска.
вѣдѣаше бо ѣко зависти ради прѣдашѧ і архⸯиереі.
архⸯиереі же поманѫшѧ народоу. да паче вараавѫ отъпоуститъ ꙇмъ.
Пилатъ же отъвѣштавъ. пакꙑ рече
чьто оубо хоштете створ҄ѭ.
егоже г҃лете ц҃рѣ ꙇюдеꙇска.
они же паче възъпишѧ
пропьни и.
пилатъ же г҃ла ꙇмъ.
чьто оубо створи зъло.
они же лише възъпишѧ
пропьни і.
Пилатъ же хотѧ народоу похоть сътворити. поусти ꙇмъ вараавѫ. ꙇ прѣдастъ и҃са тепъ. да і распънѫтъ.
Воꙇни же ведошѧ і вънѫтрь на дворъ. еже естъ прѣторъ. ꙇ призъвашѧ вьсѫ спирѫ.
ꙇ облѣшѧ і въ прапрѫдѫ. ꙇ възложишѧ на н҄ь. съплетъше. трьновъ вѣньць.
ꙇ начѧсѧ цѣловати і.
радоуі сѧ ц҃рю ꙇюдѣꙇскъ.
ꙇ бьѣахѫ трьстьѭ по главѣ. ꙇ пльваахѫ на н҄ь. ꙇ прѣгꙑбаѭште колѣна. поклан҄ѣахѫ емоу.
Ꙇ егда порѫгашѧ сѧ емоу. съвлѣшѧ съ н҄его прапрѫдъ. ꙇ облѣшѧ и вь ризꙑ своѩ.
ꙇ изведошѧ і да і пропьнѫтъ.
Ꙇ задѣшѧ мимоходѧштю. етероу симоноу. к҄урѣниноу грѧдѫштю съ села. о҃цю алекⸯсанⸯдровоу. ꙇ р[оу]фовоу. да възъметъ кръстъ его.
Ꙇ приведошѧ і на мѣсто ꙉелъꙉота. еже естъ съказаемо краниево мѣсто.
Ꙇ даѣхѫ емоу. питі оцьтъно вино.
онъ же не приѩтъ.
Ꙇ пропьнъше і. раздѣльше ризꙑ его меташѧ жрѣбьѩ о н҄ѧ.
къто чьто вьзъметъ.
Бѣ же година трьтьѣ.
ꙇ пропѧшѧ і.
ꙇ бѣ насⸯпанье винꙑ его напⸯсано.
Ꙇ съ н҄имь распѧшѧ два разбоꙇника. единого о деснѫѭ. а дроугааго о шюѭ его.
Ꙇ събꙑстъ сѧ пⸯсаное еже г҃летъ.
Ꙇ съ безаконникома причьтенъ бꙑс.
ꙇ мимоходѧштеи хоул҄ѣахѫ і. покꙑваѭште главами своꙇми. ꙇ г҃л҄ѭште
оувⸯва. разарѣѩі цръкъве ꙇ трьми дьньми съзидаѩ. с҃ъпси сѧ самъ. ꙇ съниди съ к҃рста.
Такожде ꙇ арⸯхиерѣі рѫгаахѫ сѧ. съ кънижьникꙑ. дроугъ дроугоу г҃лаахѫ.
ꙇнꙑ с҃пе. али себе не можетъ съпасти.
х҃ъ ц҃рь ꙇ҃левъ. да сънидетъ нꙑн҄ѣ съ к҃рста.
да видимъ ꙇ вѣрѫ ꙇмемъ. к҃оц ⁛
Ꙇ пропѧтаѣ съ н҄имь. поношаашете емоу.
Бꙑвъши же годинѣ шестѣі. тъма бꙑс по вьсеі земл҄и. до девѧтꙑѩ годинꙑ.
Ꙇ въ девѧтѫѭ же годинѫ вьзъпи и҃с. гласомь вельемь г҃лѧ.
елоі елоі. лима завахътани.
еже естъ съказаемо.
б҃же мои. б҃же мои въскѫѭ мѧ остави.
Ꙇ етериі отъ стоѩштиіхъ. слꙑшавъше г҃лаахѫ.
виждь.
ꙇлиѭ глашаетъ.